चराङ खोला पुलमा गाडी गुडेपछि स्थानीयमा उत्साह

जोमसोम । कालिगण्डकी करिडोर (बेनी—जोमसोम—कोरला) सडक आयोजना अन्तर्गत मुस्ताङको उत्तरी कोरलानाका जोड्ने निर्माणाधीन चराङ खोला पक्की पुल सोमबारदेखि सञ्चालनमा आएको छ ।  दसै —तिहार अघि आशिंक बाँकी रहेको चराङ खोला पुलको अहिले निर्माण सम्पन्न भई गाडी गुडेपछि स्थानीय नागरिक उत्साहित भएका छन् । 

उपल्लो मुस्ताङको कोरला पहुँचमार्ग सडक अन्तर्गत चराङ खोलामा निर्माण सम्पन्न भएको पुलको स्थानीय गुम्बाका लामाहरुले बौद्ध धार्मिक परम्परा अनुसार पुजापाठ गरी  पुल माथि सवारी साधन संञ्चालनमा ल्याईएको हो । चराङ खोला पुलको लोघेकर दामोदरकुण्ड गाउँपालिकाका अध्यक्ष लोप्साङ छोम्फेल बिष्टले  रिवन काँटेर  उद्घाटन गरे । पुल उद्घाटनपछि अध्यक्ष बिष्टले कोरला सडक अन्तर्गत ढिलै भएपनि चराङ खोला पुल सम्पन्न भएकाले यहाँका नागरिक र पर्यटकलाई बाह्रै महिना यात्रा गर्न सहजता प्रदान गरेको बताए । उनले कोरला सडक अन्तर्गत उपल्लो मुस्ताङमा थप केही पुल पनि ढिलासुस्तीका कारण अल्झिएर बसेको र त्यसलाई पनि चाँडै सम्पन्न गर्नेतर्फ आफुहरु खुलेर लाग्ने जनाए । पुल संञ्चालनमा ल्याईएपछि लोघेक दामोदरकुण्ड गापाका अध्यक्ष लोप्साङ छोम्फेल बिष्टले पुल बनाउने निर्माण कम्पनीका प्रतिनिधिहरु, स्थानीय नागरिकहरु, लामाहरु र सवारी साधनमा यात्रा गर्ने पर्यटकहरुलाई खुसीयाली स्वरुप खाँदा लगाईदिएका थिए ।

 चराङ खोला पुल संञ्चालनमा आएसंगै उपल्लो मुस्ताङ आउजाउ गर्ने सवारी साधनहरु पुल माथिबाट गुड्न थालेका छन् । पुल बनेपछि त्यहाँका नागरिकहरुमा उत्साह थपिएको छ । उनीहरुले कोरला सडकलाई पनि कालोपत्रेको रुपमा लैजान सरकारले पहल गरोस भन्ने कामना गरेका छन् ।

राष्ट्रिय गौरवको कोरला सडक अन्तर्गत उपल्लो मुस्ताङको लोघेकर दामोदरकुण्ड गाउँपालिका—१ चराङ खोलामा निर्माणाधीन पुल २०७५ साल असार २९ गते काष्ठमाण्डप कन्ट्रक्सन प्रा.लि.ले १० करोड १८ लाख लागतमा ठेक्का सम्झौता गरेको थियो । दुई स्पानको ८० मिटर लामो चराङ खोला पुलको सुरुवाती ठेक्का सम्झौता अनुसार २०७७ साल पुस ९ गते सकिनु पर्ने थियो । तर, ढिलै भएपनि चराङ खोला पुल ६ वर्षको अवधिमा सम्पन्न हुन सकेको हो ।

साढे २ वर्षको सम्झौता अवधि तोकिएको कोरलानाका जोड्ने चराङ खोला पुल निर्माण कम्पनीको काम निर्माण कम्पनी काष्ठमाण्डप कन्ट्रक्सनको चरण ढिलासुस्ती र बेवास्ताका कारण पुल निर्माणको काम लामो समयसम्म अलपत्र पर्दै आईरहेको थियो ।

चराङ खोला पुल निर्माणका क्रममा निर्माण कम्पनीले भौगोलिक विषमता, प्रतिकुल मौसम, हिमपात र अत्यधिक चिसोले निर्माणको काममा बाधा परेको उल्लेख गर्दै पुलको म्याद ५ पटकसम्म थप गरिएको थियो । पछिल्लो सार्वजनिक खरिद ऐन १३ औ संशोधन अनुसार जीर्ण आयोजनाहरुको म्याद सरकारले स्वतः एक वर्ष थप्न प्रावधान गरेसंगै चराङ खोला अलपत्र पुलको म्याद आयोजनाले असार ६ गतेसम्म कायम गरेको थियो ।

कालिगण्डकी करिडोर (बेनी—जोमसोम—कोरला) सडक आयोजनाका सूचना अधिकारी विष्णु चापागाईंले कोरलानाका जोड्ने चराङ खोला पुल सोमबारदेखि संञ्चालनमा आएको जानकारी दिए ।  उनले चराङ खोला निर्माणधिन पुलको दाँयाबाँया एप्रोज सडक तथा एप्रोज चौडा गरिनुको साथै पुलको केही फिनिसिङको काम बाँकी रहेकोमा पुलको सबै कार्य सकिएको बताए ।

लोघेकर दामोदरकुण्ड—१ चराङका वडाध्यक्ष टै ढिन्डुक ठकुरीले ढिलै भएपनि चराङ खोला पुल निर्माण सम्पन्न भएर संञ्चालनमा आएको जानकारी दिए । कोरलानाका जोड्ने चराङ खोला पुल सञ्चालनमा आएपछि बर्खायामको मौसममा खोलाको सतह उच्च हुँदा सवारी आउजाउमा निकैनै सहज पू¥याउने वडाध्यक्ष ठकुरीले बताए ।

यसैगरी आयोजना अन्तर्गत मुस्ताङको घरपझोङ गाउँपालिका—२ मार्फा राजखोलामा निर्माणधिन ३ स्पानको ९० मिटर लामो पक्की पुल पनि अन्तिम चरणमा पुगेको छ ।हिमढुङ ठोक्कर ईमोटल जेभी कन्ट्रक्सनले २१ करोड लागतमा ठेक्का सम्झौता गरेको दुई पुल मध्ये मार्फा राज खोला पुल एक हो । निर्माण कम्पनीले छुसाङ नरसिंह खोला पुल २ महिना अधि सम्पन्न गरेको छ भने मार्फा राज खोला पुल पनि अन्तिम चरणमा पुग्दा पुल निर्माणकार्य सुस्त बनेको हो । मार्फा राज खोलामा पनि दसै अगावै सम्पन्न गर्ने लक्ष्य राखिएको भएपनि निर्माण कम्पनीको ढिलासुस्तीले पुल सम्पन्न हुन विलम्व भएको हो ।

राष्ट्रिय गौरव उत्तरी चिनको स्वशासित क्षेत्र तिब्बतसँग सिमाना जोडिएको कोरलानाकासम्म जोमसोमदेखि माथि आयोजना अन्तर्गत यसअघि ७ वटा पक्की पुल निर्माण सम्पन्न भइसकेको आयोजनाको भनाइ छ । चराङ खोला पुल सम्पन्न भएपनि आयोजना अन्तर्गत कोरलानाका जोड्ने घमी खोला पुल मात्रै निर्माण कार्यले गति लिन सकेको छैन ।

आयोजना अन्तर्गत निर्माण भएको वारागुङ मुक्तिक्षेत्र—४ कागबेनी स्थित कागखोलामा निर्माणाधीन कोरलानाका जोड्ने पक्की पुल निर्माणको अन्तिम चरणमा रहदा पोहोर साल साउन २८ गते आएको बाढीले क्षति तुल्याएको थियो । आयोजनाले त्यहाँ अर्को पुल निर्माण गर्नका लागि पुल बिशेषज्ञहरु झिकाएर त्यहाँका भौगोलिक अध्ययन अनुसन्धान गरेको थियो ।

राष्ट्रिय गौरवको कोरला सडक अन्तर्गत कालिगण्डकी नदीमा मिसिने अधिकाँश शाखा नदीहरुमा पक्की पुल बनिसकेकाले मुस्ताङ आउजाउ गर्न समस्या नपर्ने बताइएको छ । एकाध स्थानमा निर्माण कम्पनीका कारण र अर्को त्यहाँको भौगोलिक अवस्थाले गर्दा पुल निर्माणको काममा बाधा पुग्दै आइरहेको छ । कोरला जोड्ने राष्ट्रिय गौरवको (बेनी—जोमसोम—कोरला ) सडकको समग्र भौतिक प्रगती ८० प्रतिशतको हाराहारीमा छ ।