पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
मनिता थकाली
जोमसोम— संविधान सभा सदस्य एवं माओवादी केन्द्रका जिल्ला नेता बिरेन्द्र जुहारचनको अन्त्येष्टि कार्यक्रममा माओवादी केन्द्रका पार्टी महासचिव देव गुरुङ लगायतका नेता मुस्ताङको मार्फा पुगेका थिए । संविधान सभा सदस्य जुहारचनको पार्थिव शरिरमा श्रद्धान्जली अर्पण तथा पार्टीको झन्डा ओढाएर सम्मान गर्ने कार्यक्रममा पार्टी महासचिव गुरुङ लगायतका माओवादी नेताहरु मुस्ताङको मार्फा पुग्नु भएको हो ।
माओवादी केन्द्रका जिल्ला नेता तथा संविधान सभा सदस्य जुहारचनको आज शुक्रबार बौद्ध परम्परा अनुसार मुस्ताङको मार्फा स्थित राजखोला र कालिगण्डकी दोभानमा अन्त्येष्टि गरिएको हो । यसअघि संविधान सभा सदस्य जुहारचनको पार्थिव शरिरमा माओवादी केन्द्रका महासचिव देव गुरुङ, मुस्ताङ जिल्ला ईञ्चार्ज कपिल लामा र जिल्ला समन्वय समिति संयोजक धीरेन्द्र विक र प्रदेश कमिटी सदस्य ङुटुक गुरुङ (टाईगर)ले माओवादीको झन्डा ओढाए । संविधान सभा सदस्य जुहारचनको अन्त्येष्टिमा माओवादी केन्द्रका जिल्ला ,प्रदेश र केन्द्रिय नेताहरुको उपस्थिती रहेको थियो ।
संविधान सभा सदस्य जुहारचनप्रति भावपूर्ण श्रद्धान्जली अर्पण गर्दै पार्टी महासचिव देव गुरुङले जुहारचनको निधनले पार्टी र कम्युनिष्ट आन्दोलनप्रति क्षति पुगेको बताउँनुभयो । महासचिव गुरुङले यस दुःखद घडीमा शोकलाई शक्तिमा रुपान्तरण गरी अघि बढ्नु पर्ने बेला आएको उल्लेख गर्नुभयो ।
संविधान सभा सदस्य जुहारचनको ६९ वर्षको उमेरमा बिहिबार मुस्ताङको मार्फा स्थित आफ्नै निवासमा निधन भएको हो । संविधान सभा सदस्य जुहारचनको निधनप्रति नेकपा (माओवादी केन्द्र)ले शोक वक्तव्य प्रकाशित गरी श्रद्धान्जली अर्पण गरेको छ । यसैगरी संविधान सभा सदस्यको निधनप्रति माओवादी केन्द्रले पनि शोक वक्तव्य प्रकाशित गरी श्रद्धान्जली अर्पण गरेको जिल्ला समन्वय समिति संयोजक धीरेन्द्र विकले जानकारी दिनुभयो ।
संविधान सभा सदस्य जुहारचनले तत्कालिन पुष्पलाल समुहबाट २०३० सालदेखि राजनीतिक यात्रा प्रारम्भ गरेका थिए । त्यसपछि माओवादी केन्द्र हुँदै २०६४ सालमा माओवादी केन्द्रको समानुपातिक क्लस्टरबाट सांसद भई संविधान सभा सदस्य भएका थिए ।
